المواصلة المستحيلة

كان فيه جملة كدة مش فاكرة قريتها فين ان الدولة الناجحة هي اللي أغنياءها بيركبوا مواصلات عامة مش إن فقرائها بيتملكوا عربيات. 

ودا يدينا فكرة عن مدي تحضر القاهرة بين الأمم. 

مشهد ١ : بركب تاكسي وأول حاجة أبص عليها العداد، كوكو بتكلمني مش عارفة اركز معاها، عيني مش عارفة تفارق العداد، ايه النصب دا ١٠ جنيه خلصت وانا لسه مطلعتش من المعادي أصلا... بدأت اعرق من التوتر .. مش معقول الفلوس الكتير اللي حتدفع دي .. دا حرام والله .. بس يا كوكو بطلي زن ... حسن مش وقته الرضاعة يا لهوي ١٥ جنيه .. طب الناس عايشة ازاي .. طب ماهو انا حتي لو ركبت المترو ماهو أوصل للمترو بركب يبتاع ٨ جنيه رايح و ٨ جنيه جاي ... انا عمري ما حفاصل مع التاكسيات في طنطا تاني ... خلاص ححاول امشي أطول مسافات ممكنة .. مش حطلع من المعادي ... يا لهوي ٣٠ جنيه 

مشهد ٢ : 

مبسوطة من المشي يا كوكو ؟ الشوارع جميلة ؟ 

كوكو: لأ 

إنه الهوّل

#العتبة_أول_مرة 

#يا_خراشي

النداهة

كل اللي بيروحك بيشتم فيكي .. و كل اللي بيروحك مبيرجعشي , حاولنا نخلق سوق في الأقاليم ولكنها المركزية اللعينة أخي في الله ومع ان الملافظ سعد سموها القاهرة .. محدش قال لهم ان كل واحد له حظ من أسمه عملت ليه كدة يا برنس فيه أجيال وراك أتدمرت 

مدونة جديدة بشوكتها عن القاهرة بعيون نازحة من الأقاليم قبل ما أخش في المفرمة وأفقد براءة الإنبهار الأول ... وأبقي متعودة 

يا منجي من المهالك يا رب